18 Oct 2008 - 19 Oct 2008

呢個weekend, 我同baby去左長洲度假, 順便補番慶祝我地拍拖年半紀念. 

我一點鐘放工之後買埋野食就去IFC join埋baby一齊去中環碼頭, 我地搭兩點九班船入長洲.  大約三點半到達長洲碼頭之後, 就去華威酒店check in.

我地係華威酒店訂左一間向海既房間, 間房既顏色好靚, 以白色同藍色為主, 仲有一個對住東灣泳灘既露台. 露台上有一張枱同兩張椅, 住客可以坐係露台一邊食飯, 一邊欣賞美麗既海境.

我同baby都好享受呢度寧靜環境, 可以遠離工作煩惱, 盡情忘憂!

(待續)

7 August 2008

今日係我同baby拍拖16個月紀念日, baby, 我愛你!  我地放工之後去左銅鑼灣行左一陣, 之後就去左食california. 我地好鍾意食凱撒沙律加雞肉, 係我地既指定餸菜! 每次見到baby食野我都有種好幸福既感覺, 我好想見到佢幸福開心既表情, 我希望佢唔會有任何既煩惱, 無憂無慮.

自從入左信德集團, 返左呢份新工之後, 我每朝起身都好唔願意返工, 講真我幾唔鍾意呢份工既工作性質, 雖然工作環境好, 福利好, 人工滿意, 而且同事們對我好, 但係對住個惡頂上司都幾辛苦, 時常有孤立無援既感覺. 我之可以頂到五個月, 好大程度係因為baby. 因為佢係我既精神之柱, 我同自己講要事業有成, 搵多d錢, 俾佢一個幸福既生活!

我要繼續加油, 努力, 直到搵到自己喜歡既工作為止! 或許畢業之後, 第一份工既工作比較順利, 考驗比較少, 而呢份工係上天俾我既第一個考驗, 我會克服所有困難同屈辱, 證明自己既能力!

我愛你, Baby! 我會永遠係你身邊支持你!

6 July 2008

雖然聽日先係我同baby拍拖15個月紀念日, 但因為呢排成日OT, 正所謂"今日唔知聽日事", 為左避免要開OT同唔到baby食飯, 我地決定提早一日慶祝!

我差唔多早一個星期訂枱, 同baby食<<南蠻亭>>. 我地大家都好鍾意食個度d煎炸野, 雖然超級熱氣, 但因為實在係太好味既關係, 我地都豁出去啦

我地下午係屋企睇<<衝上雲霄>>, 夜晚七點出發去銅鑼灣. 今次我地叫番上次既野食, 並且主攻露筍豬肉卷同紫蘇葉豬肉串, 真係正到無得頂!!!(諗起都有d餓)

我地食飽之後大約九點幾就返歸

p.s. baby, 我地轉眼間已經一齊左十五個月, 有好多好多珍貴既回憶, 你已經成為左我生命中最重要既人, 我希望可以同你一齊, 直到永遠

1 July 2008

今日係baby生日既大日子, 我地決定同上年一樣去迪士尼樂園慶祝!

唔好同我講話又去迪士尼咁悶, 無野玩呀, 我覺得香港迪士尼雖然細, 但有佢既可取之處! 佢充滿著我同baby開心快樂既回憶, 而且呢度既煙花表演仲出色過日本東京迪士尼, 所以我同baby一樣都好鍾意香港迪士尼樂園!!  所以香港迪士尼樂園要加油, 千祈唔好輸俾海洋公園呀!

我同baby兩點左右到迪士尼, 我地同完d卡通人物影相之後就去左新落成既<<小小世界>>. 佢俾我想像中既好得多, 無論音樂, 燈光, 佈置, 公仔, 主題...樣樣都好出色, 真係正! (起初我仲驚可能馬馬虎虎咁繞兩個圈就完, 點知有驚喜)  

今次我地玩左d上幾次都無玩過既遊戲, 如小飛象, 泰山個邊既森林探險之旅(唔知叫乜名), 此外之前每次黎都會睇既golden mickey都加入左d新元素, 増加左新鮮感!

不過下午巡遊實在太曬, 太熱啦, 企係前排既人都開傘遮太陽, 攪到企後排既我地睇得唔清楚, 令到無咁投入添 

夜晚我同baby都欣賞期待已久既煙花表演, 個show實在太精彩, 難以形容, 只能: 嘩! 嘩! 嘩! 好靚呀! 嘩~

我地大約九點左右就離開呢個奇妙既夢想世界, 重返現代化, 壓力沈重既香港

我地返家前去左食明記糖水呢

p.s. baby, 生日快樂, happy birthday!